Nə qədər qəribə səslənsə də, ürək xəstəliklərinin yaranmasında qadınlar və kişilər arasında ciddi fərqlər var. Dünyanın qabaqcıl tibbi mərkəzlərində aparılan çoxsaylı tədqiqatlar göstərir ki, bu fərqlər həm ürəyin anatomiyasında, həm də yarana biləcək xəstəliklərdə özünü göstərir. Bəs bu fərqlər hansılardır?
Ürək və damarların ölçüsü
Hər kəsin ürəyi anatomik quruluşca oxşar olsa da, qadınlarda ürək və onun kameraları daha kiçik, damarlar isə daha nazik olur. Bu, bəzi diaqnostika və müalicə yanaşmalarında da nəzərə alınmalı fərq yaradır.
Hormonların rolu
Qadınlarda menopauza (klimaks) zamanı estrogen və digər hormonların səviyyəsindəki dəyişikliklər yüksək qan təzyiqi, şəkərli diabet və ürək-damar xəstəliklərinin artmasına səbəb olur. Estrogen reproduktiv yaşda təbii qoruyucu təsir göstərir; bu təsir menopauzadan sonra zəifləyir.
Risk faktorları
Risk faktorları da cinsə görə fərqlənir. Kişilərdə əsas risklər siqaret, alkoqol, stress və düzgün olmayan qidalanmadırsa, qadınlarda erkən yaranan arterial hipertoniya, şəkərli diabet, artıq çəki və az hərəkətli həyat tərzi (hipodinamiya) önə çıxır.